مقال رائع ستجد نفسك فيه بعنوان : كفاية حسابات بقلم الاستاذ محمد كامل النهاردة حنتكلم على الحسبة الغلط جدي الله يرحمه مراته ماتت وهو في ...
مقال رائع ستجد نفسك فيه بعنوان : كفاية حسابات
بقلم الاستاذ محمد كامل
النهاردة حنتكلم على الحسبة الغلط
جدي الله يرحمه مراته ماتت وهو في مقتبل العمر .. ربى ولاده وسهر على راحتهم لحد ما جوزهم كلهم
و أول ما وصل شاب من عمره ولاده قالوا يشوفوله عروسة تاخد بالها منه
اتجوز بنت من الفلاحين في مقتبل العمر هي كمان و كان عندها ساعتها 30 سنة تقريبًا
كل ولاده عاملين حسابهم انها تسنده الشوية اللي باقيين من حياته و تورثه و تكمل حياتها بشكل طبيعي لاسيما انها مكانتش بتخلف
اتفقوا كلهم انه يكتبلها كل ما يملك كنوع من تأمين مستقبلها بعد ما يموت
و بالفعل كتبلها كل حاجة ،، أراضي و بيت و فلوس ،، حتى أنبوبة البوتاجاز عملها عليها تنازل
تعدي الأيام و جدي صحته تتعب شوية ،، يدخل المستشفى .. نقول ايه ده جدو بيموت
يفوق
نقول صحصح صحصحة الموت
يكمل عليهم 5 سنين كمان بصحة زي الفل
الاتنين عاشوا حياة جميلة بس كلها ترقب للحظة اللي حيموت فيها ،، و العمر بيعدي بيهم هما الاتنين
عدى 30 سنة
جدو عمره 90 و مراته عمرها 60
ماتت هي .. قضت عمرها الافتراضي و ماتت يعني
و جدو اللي حصلها بعدها بكمان 17 سنة ورثها
ايوا الله
مات عن عمر يناهز 107 سنة وورث مراته اللي كلنا افتكرنا إنها حتورثه
القصة دي بتفكرني بالأم اللي بتروح تشتري تي شيرت لإبنها كبير على مقاسه عشان يعيش معاه .. و أول ما يبأه على مقاسه يدوب
والناس اللي بتفضل طول عمرها مستنية فرصة .. فرصة بتتمثل في شغل أو بيت او زوج ،، و أول ما تجيلها ميكونش عندها الشغف ليها
والمغترب اللي بيحرم نفسه من كل متاع الدنيا على أمل يصرف الفلوس اللي حوشها في بلده لما يرجع ،، و يموت غريب من غير ما حد يصلي عليه ،، لا استمتع بحياته ولا رجع لأهله غير في تابوت
الإنتظار ده أسوأ شعور إنساني ممكن الواحد يعدي بيه ، لإن بسببه بيقع فريسة لحسبة الورقة والقلم ، و اللي دايمًا بتكون خسرانة
الدنيا غريبة جدًا و والقدر دايمًا بيفاجئنا و عشان كده اللي يضيع لحظة من عمره من غير ما يستمتع بيها و يعيشها زي ما هي هو الوحيد اللي خسران 😊 متستنوش حد ، و متتعشموش ، ومتضيعوش عمركم في انتظار الولا حاجة و استمتعوا
كفاية حسابات
بقلم محمد كامل
ليست هناك تعليقات