انت نموذج مشرف وانا بافتخر بيك وهاعلم ابني انه يقلدك

  يكتب الدكتور احمد شرابى على صفحته هذا الموقف فيقول :  وانا في العيادة لقيت صوت عالي بيقول: الولد ده بيموووت .. ودخلي غرفة الكشف وهوا بيجري...

 

يكتب الدكتور احمد شرابى على صفحته هذا الموقف فيقول : 

وانا في العيادة لقيت صوت عالي بيقول: الولد ده بيموووت .. ودخلي غرفة الكشف وهوا بيجري "في الصورة" وهوا شايل طفل مغمي عليه .. كشفت عليه لقيته كان عنده تشنجات وحرارة وده ما بعد التشنجات .. فبسأله سنه أد ايه؟ قالي معرفش! طب اسمه ايه؟ قالي معرفش! قلتله متعرفش ازاي يعني؟ قالي أنا معرفوش ، أنا كنت ماشي في الشارع لقيت واحده بتصوت في الشارع وبتقول ابني بيموت فخطفته منها وطلعت بيه جري علي هنا إنما أنا معرفهمش ..

بعد شويه جت مامته ودخلت عليا وعينيها بتبص علي ابنها و بتبصلي وكل علامات الرعب في وجهها .. طمنتها علي أنه كويس متقلقش قعدت علي الارض وقعدت تعيط بكل حرقة وهيا بتقول يا رب أنا محيلتيش غيره ...

طمنتها علي الولد وشرحتلها العلاج هيتم ازاي بالتفصيل .. وأثناء الكلام لقيت الشاب بيديها كيس اسود وبيقولها الكيس ده وقع منك وسابنا ومشي .. ولقيت ام الولد بتبص في الكيس وبتقول ده سابلي فلوس وطلعت تجري ورا الشاب وتنادي عليه ترجعله الفلوس، والشاب موقفش ومشي بسرعة ... ولقيت الأم بتقولي أنا زعلانة علشان الشاب ده ، شكله غلبان هوا كمان زينا والفلوس اللي سابهالي دي شكلها يوميته اللي طالع عينه بيها زينا !!

عايز اقول للشاب الجميل اللي جاب الولد: يا رب تكون شايف البوست ده ، وانت والله شرفتني النهاردة ، ودخلتك دي عليا النهاردة بالولد ده هتفضل محفورة في ذهني وهحكي لابني اللي انت عملته وهفرجه علي صورتك وانت بتجري بولد انت متعرفوش علشان تلحقه وهعلمه أنه يقلدك .. أنا والله أتشرفت بيك.