قلق الانفصال عند الاطفال مظاهره وعلاماته وكيفية التعامل الصحيح معه لو طفلك متعلق بيكي جداً وبيعيط لو سبتيه مع حد وحاسة إن حياتك واقفة بسبب ...
قلق الانفصال عند الاطفال مظاهره وعلاماته وكيفية التعامل الصحيح معه
لو طفلك متعلق بيكي جداً وبيعيط لو سبتيه مع حد وحاسة إن حياتك واقفة بسبب تعلقه الشديد بيكي..😥
فاحنا نحب نطمنك إن دي حالة طبيعية بيمر بيها كل طفل ودليل على تطور طفلك واسمها "قلق الانفصال"
في البوست دا هنعرف كل مامي ايه هو قلق الانفصال وازاي تعرف تتعامل معاه 😊
بيظهر قلق الانفصال عن الأطفال من سن ١٠ شهور وفي الغالب بيقل تماماً عند سن السنتين بس ممكن يستمر لحد ٤ سنين وممكن عند بعض الأطفال يظهر من سن ٦ شهور، ودا بيختلف حسب طبيعة كل طفل🥰
طب ايه هي علامات قلق الانفصال؟
طفلك بيعيط لما تبعدي عنه أو تسبيه مع حد وتروحي مكان😭
طفلك بيضايق لما بيشوف ناس غريبة😟
طفلك بيصحى من نومه يعيط لو قمتي من جمبه 🥺
طفلك عاوزك انتي تلعبي معاه ومش بيحب يلعب لوحده ولا مع أطفال تانية.🤦
#طب إزاي تقدري تتعاملي مع طفلك في المرحلة دي؟
١-الانفصال التدريجي
بمعنى إنك تسيبي طفلك فترة قصيرة مع حد طفلك يعرفه كويس زي جدته مثلاً ومع الوقت نزود المدة ونسيبه مع شخص معرفته بيه أقل.
وممكن نعمل كدا في محيط البيت بحيث نسيبه في غرفة وتكون الأم في مكان تاني بتكلمه وسامع صوتها🧡💜
أو مثلاً نلعب معاه لعبة زي لعبة بخ "عو" بس نستخبى تماماً مش نخبي وشنا بس 🙈🙈
٢-التخطيط
بمعنى إن لو طفلك كبير شوية نقدر نتكلم معاه ونخطط للي هنعمله طول اليوم يعني مثلاً تقوليله إنك هتيجي تاخديه بعد الحضانة أو انكم هتقرأوا سوا بليل كتاب أو قصة بيحبها؛
وطبعاً لازم يا مامي توفي بكلامك عشان تبني ثقة بينك وبين طفلك💙🎁
٣- التذكار
بمعنى اننا نسيب مع الطفل لعبته المفضلة أو حاجة فيها ريحة مامي زي مثلا اسكارف او شنطتك اللي هو عارف كويس انها بتاعتك🧡
٤-متعيطيش قدام طفلك أبداً
يعني مثلا أول يوم ليه في الحضانة هيعيط مينفعش تقفي قدامه تعيطي، كل المطلوب منك ابتسامة وكلام حلو يطمنه وانك هترجعي تاخديه و روحي عيطي في البيت أو الشغل بقى براحتك 😅
٥-الصبر ثم الصبر
مش محتاجين نقولك إن طفلك مش هيفضل يعاني من قلق الانفصال طول عمره،
وإنك في يوم هتوديه الحضانة وهيعمل باي بكل فرحة ويصحيكي كمان من أحلى ويقولك أنا عاوز أروح الحضانة🥳🥳
٦-نخرج كتير ونتعرف على ناس جداد
وكل مرة نقابل ناس جداد أو أي حد الطفل قلقان من وجوده بنحاول تخلي البيبي معاكي وتعرفيه على الناس ويشوفك وانتي بتتعاملي معاهم بود وبعدين نبدأ نسيبه ينطلق واحدة واحدة
يعني مش تجبري طفلك بوس طنط ولا روح لعمو أرجوكي 😭😅
٧-إياكي ثم إياكي تمشي وتسيبي طفلك وهو مش واخد باله
دا بيزود عنده قلق الانفصال وبيخليه طول الوقت عينه عليكي وخايف تمشي وتسبيه،
لازم كل مرة قبل ما تمشي تقولي لطفلك إنك هتمشي حتى لو هيعيط، وهو مع الوقت هيفهم انك لما بتمشي بترجعي🙋🙋
٨-شوية اعتماد على النفس
زي انك مثلا تبعتي طفلك يجيب حاجة من غرفته لوحده ومتروحيش معاه ودا طبعاً لو غرقته متأمنة كويس، بحيث يتعود انه يكون لوحده حتى ولو دقايق.👶👶
٩-روتين أو طقوس الوداع
زي اننا مثلا بوسة في مكان معين، أو أغنية معينة ساعة ما تودعيه، أو حركة معينة بيحبها،
دا بيخلق عند الطفل فكرة إن ماما بتمشي بعد الحاجة دي وبتيجي تاني بعدها بشوية.🙈
١٠-إياكي تشعري بالذنب يا مامي
اللي بيحصل مع طفلك مش بسبب تقصيرك في شيء ولا بسبب خطأ في تربيتك ليه،
اللي بيحصل سببه إن ابنك مش بيحس بأمان غير في وجودك وانتي مصدر الأمان والاعتماد بالنسباله،
فمتلوميش نفسك
ليست هناك تعليقات