قصة حقيقية موسى البنغالي وصحن الفول حدثت هذي القصة في شمال الرياض تحديدا . يقول احدهم : مرة كان الجو بارداً في الرياض كنت قايم ابروح للدوام...
قصة حقيقية موسى البنغالي وصحن الفول
حدثت هذي القصة في شمال الرياض تحديدا .
يقول احدهم : مرة كان الجو بارداً في الرياض كنت قايم ابروح للدوام واذا بزميلي مرسل لي رسالة .
يابوفلان وانت جاي جب معك فطور.
قلت خل امر الفوال اللي قريب من الدوام واجيب لهم فطور.
وصلت الفوال واذا فيه زحمة وطابور .
صفيت معهم وقعدت انتظر دوري علشان اطلب من الكاشير .
وانا واقف في السرا دخل عامل صغير لابس كاب عمره من ٢٠ ~ ٢٢ سنه واتجه مباشرة للكاشير السوري وكلنا مستغربين ليش ما يصف معنا سرا .
المهم ارتفع صوت الكاشير وهو يقول ما اقدر ما اقدر ما يجي .
عندها تكلمت انا وقلت انت ماتفهم حمار ارجع ارجع ورا .
والبنقالي يطالعني واعتقد ما فهم كلامي ، رفعت صوتي وقلت يالله انقلع ورا امسك سرا . وأشر له بيدي ورا ورا .
والبنقالي يناظرني وساكت ثم انصرف وكملنا السرا ...
ويوم وصل دوري وطلبت قلت للكاشير : ياخي فعلا ناس ما تستحي يشوف العالم صافه ويبي ياخذ قبلنا .
قال الكاشير : انت فاهم خطأ
قلت : وشلووون
قال الكاشير : هو جاي يسألني يقول ممكن آخذ فول بريال
قلت ماعندنا تسعيرة فول بريال .. اقل شيء ب ٣ ريال
قال البنقالي : طيب ما فيه مشكله انا اعطي ٣ ريال حق ٣ يوم وحط لي بريال .انا فلوس شويا ".
قلت لا مايصير المحل مسعر ؛ وبعدها انت تكلمت ورجعته ورا .
الراوي : التفت بعدها بسرعة ادوره وانا اردد لا حول ولا قوة الا بالله .
واسأل اللي في الشارع عنه .
قالوا ما نعرفه .
ضاق صدري عليه انه ما يملك قيمة الفطور وكيف انا نهرته وزجرته وسط الحضور .ولم يرد علي بكلمة .
رحت للمكتب وافطرنا ، ووالله مع كل لقمه اشوف البنقالي قدامي وان اللقمة اتغصص فيها .
ثم قمت
استغربوا اخوياي وشبلاك افطر
قلت لا شبعت الحمد لله .
رجعت للمحل وقلت وين البنقالي ؟
قالوا ما ندري ما رجع .
وبعد بحث مكثف لقيت راعي المغسلة يقول بابا انت تبي موسى .
قلت من موسى ؟
قال البنقالي اللي في الفوال اليوم الصباح اللي انت سوي مشكل معه .
قلت ايه وينه ؟
قال هو ما يجي كل يوم هنا
ممكن عشرة يوم او ١٥ يوم يجي مرة ثانية لأنه يشتغل في صيانة الحديقه اللي عند الجامع .
قلت خلاص ابجي بعدين اشوفه .
وما ارتاحت نفسي .
صرت امر يوميا وانا جاي للدوام ابحث عنه ؛
وبعد عشرة ايام رحت انتظر بدري عند الحديقة
ويوم جت الساعه ٧ الا وسيارة توقف وينزل منها ٤ عمال وموسى معهم .
واركض له موسى موسى .
والتفت يناظرني ومستغرب
واسلم عليه واقول وين انت ياموسى انا يدور عليك عشرة ايام .
ناظرني وهو مندهش، شكله ما عرفني .
قلت انا اللي مشكلة معك في فوال قبل عشر ايام .
ابتسم وطبطب على كتفي .
وانا اللي ادخل يدي في جيبي واطلع خمسين ريال
قلت خذ هذي ياموسى بس ما فيه زعلان . حاول يرجعها مع استحياء ورفضت وقلت تعال معي للفوال .
قلت للكاشير هذا فطوره علي متى ما جاك تعطيه اللي يبي
والحساب عندي .
فرح موسى وشكرني، وحسيت اني رديت له اعتباره وكرامته .
وبعد تقريبا شهر مريت البوفية علشان اعطيهم حسابهم .
قال الكاشير حسابه ١٥ ريال هو وخويه
جو تقريبا ٣ مرات يطلبون صحن فول واحد ب ٣ ريال واثنين شاي ، وبعدها ماعاد جاء موسى .
استغربت وانتظرت موعد حضورهم للحديقه ؛ ويوم جت السياره وينزل منها ٤ عمال .تقريبا نفس اللي شفتهم ما عدا موسى مهوب معهم
واسألهم وين موسى ؟
التفتوا لبعض وسكتوا
قلت فيه مشكلة ؟ وين موسى ؟
قال واحد منهم موسى موت .
قبل اسبوع صار حادث دهس ودخل المستشفى ٤ ايام ثم توفي .
نزل الخبر على مثل الصاعقه
وارجع في طريقي والقى راعي المغسلة .
قلت دريت ان موسى مات .
قال ايه . وانا اعرف موسى هو من نفس منطقتي وقريتي
موسى مات ابوه وعمره ١٢ سنه.وتوفيت امه وعمره ١٦سنه وتركوا له ثلاث اخوان عايشين عند عمتهم وموسى لمدة ١٨ شهر وهو يحول راتبه كامل ٤٠٠ ريال ما ينقص ريال لعمته واخوانه
قلت : وهو من وين ياكل ؟
قال : يشتغل غسيل سيارة تنظيف بيت اي شيء
ويكفيه اكله وشربه .
عندها استحقرت نفسي وعرفت ليش كان يحاول في الكاشير انه يفطر ب ريال ؛ علشان يوفر لاخوانه وعمته..
بعدها جمعت لي مبلغ ووصلناه لعمته واخوانه يمكن اكفر عن خطأي تجاه اخي موسى.
والان انا في رمضان ومع كل سجده اشوف صورة موسى امامي .
و والله اني تندمت اشد الندم اني صرخت في وجهه ولم يرد علي احتراماً او خوفاً مني
وعاهدت نفسي اني امسك نفسي ولساني عن الناس ولا اجرح او احتقر احد .
"فَلَا تَغُرَّنَّكُمُ الْحَيَاةُ الدُّنْيَا وَلَا يَغُرَّنَّكُمْ بِاللَّهِ الْغَرُورُ" فعليكم بحسن المنطق والخلق والرفق
⚡️الخلاصة
تفقدوا من حولكم ماتركوا ديارهم وأهاليهم إلا بسبب الفقر والحاجة
.jpg)
ليست هناك تعليقات