طلاسم قاتلة - قصة رعب الجزء الثاني

 طلاسم قاتلة - قصة رعب  الجزء الثاني أبويا قالي بخوف شديد اوي أومال مين اللي فتحتلنا الباب ديه !! .. في اللحظة دية كل أنوار الشقة اتقفلت وبا...

 طلاسم قاتلة - قصة رعب  الجزء الثاني

أبويا قالي بخوف شديد اوي أومال مين اللي فتحتلنا الباب ديه !! .. في اللحظة دية كل أنوار الشقة اتقفلت وباب الأوضة اترزع جامد .. وسمعنا صوت ضحكات مخيفة أوي جاية من بره .. أنا دلوقتي في أوضة ضلمة مع أبويا وجثة أختي .. فتحت بسرعة كشاف الموبايل وابويا خده مني وراح عند الباب وهو خايف أوي وحاول يفتح الباب لكن الباب مبيفتحش .. أوضة اختي مكنش فيها شبابيك خالص يعني الطريق الوحيد اللي هنخرج منه هو الباب ... 

-- زعقت في أبويا وانا بعيط وقولتله " اكسر الباب .. خرجني من هنا " بس ابويا كان سنه أكبر من انه يكسر باب أوضة مقفول بطريقة قوية جدا اكنه متفتحش من كذا سنه .. الأصوات اللي بره بدءت تعلى جامد وسمعت كلام بس مكنش بلغتنا فمهمتش حاجة .. بس فجأة الأصوات كلها سكتت .. أنا دلوقتي قاعدة ورا الباب بعيد عن السرير ومبرقة في جثة أختي وبعيط .. أبويا قالي امسكي الكشاف وانا هحاول اكسر الباب من كتر خوفي التليفون وقع مني ع الأرض بس وانا بوطي أجيبه لقيت حاجة .. لقيت ورقة ع الأرض متطبقة .. 

- قربت الكشاف من الورقة عشان أشوف ايه اللي فيها ... الورقة كان لونها أصفر باهت وملمسها خشن أوي .. أنا أول مره أشوف ورقة زي دية .. فردت الورقة بس كان جنب الورقة متاكل أكنه مقطوع من كتاب ... لسه هقرا اللي مكتوب فيها لقيت أبويا رماها من إيدي و هو بيزعق وبيقولي انتي بتعملي ايه نوري الكشاف ده عشان نخرج من هنا .. الورقة وقعت ع الأرض جنب جثة أختي ... نورت لأبويا عند الباب بس من غير فايدة .. الباب مش بيتحرك حتى .. صوت بأعلى صوتي ع الجيران بس محدش سمعني ولا هيسمعني .. قعدت بيأس جنب الباب تاني وانا ببص على جثة أختي وبعيط وابويا فضل واقف عند الباب يفكر هنخرج ازاي من هنا .. 

-- الورقة كانت ملفته اوي وهي ع الأرض بس المشكلة انها جنب ايد اختي اليمين قربت وانا خايفة اوي من الورقة ومديت ايدي عشان أجيب الورقة واشوف ايه اللي جواها مسكت الورقة وفتحتها لقيتها مكتوبه بخط يدوي بس باين انها قديمة اوي .. عنيا جت على اول جملة في الورقة كان مكتوب عليها " الطلسم ال..." الكلمة التانية مكنتش واضحة خالص .. بدءت أقرى في الورقة وانا خايفة " الصفحة الخامسة والثلاثون .. هذا أهم وأخطر طلسم في هذا الكتاب ولا أنصح أحد بتنفيذه لإنه ........ وأي كلمة به من الممكن أن تؤدي للقتل على يد نفر من الجن أو ......... " في كلام كتير مكنش واضح في الورقة .. 

- أبويا قالي وهو متعصب إيه الورقة ديه .. قولتله بخوف " ديه تقريبا طلسم " .. أبويا مسك الورقة وقطعها جزئين ورماها ع الأرض بس المشكلة ان كان لسه في جزء مش قريته .. ابويا خد بطانية وغطا بيها جسم مريم كله وقالي احنا هنفضل قاعدين لحد منعرف هنخرج ازاي وهنشوف بكشاف الموبايل .. الموبايل !! انا ازاي الفكرة ديه تاهت عني اتصلي بأي حد يلحقنا بسرعة .. مسكت التليفون وانا حاسه ان روحي رجعتلي تاني وفي امل اني اخرج من هنا واتصلت بأول رقم شوفته كان رقم خالي .. الموبايل بيرن .. أول مبدءت أتكلم لقيت صوت في الموبايل بيضحك بطريقة تخوف .. تقريبا نفس الطريقة اللي كانت بره .. قفلت السكة واتصلت بكذا رقم غيره بس كل الأرقام كان بيحصل فيها نفس اللي حصل !   

-- الوقت كان بيعدي بسرعة ونسبة شحن الموبايل بتقل وده الحاجة الوحيدة اللي هتنورلنا الأوضة .. قومت من مكاني وجمعت الورقة الصفرا تاني وابويا لسه هياخدها زعقت جامد وقولته يمكن ديه الحاجة الوحيدة اللي هتخرجنا من هنا .. فردت الورقة وكملت قرايه " فلتظهر أيها الحارس .. فلتظهر يا خادم هذا الطلسم .. فلتكون لي خادم مطيع .. يا ........... " بقيت الكلام كله مش متغطي بالدم وفي رسمه في أخر الورقة .. الرسمة ديه شبيهه بالوضع اللي أختي عليه دلوقتي ! .. فضلت أعيط وأقول انا اختي جابت الطلسم ده منين ولا عايزة تعمل بيه ايه .. مريم عمرها مجبتلي سيره حاجة زي كده .. 

- جزء وقع من الورقة ع الأرض وطيت أجيبه بس لقيت ورقه تاني ع الأرض .. المرادي ورقة لونها أبيض زي بتاعتنا .. ديه مكتوبه بخط أختي ! .. مسكت الورقة وبدءت أقراها وانا خايفة " فاطمة .. لو بتقري الجواب ده دلوقتي فأنا اكيد ميتة .. أنا اتضطريت أعمل كدا عشانكم .. طبعا انتي بتسألي نفسك دلوقتي انتي جيبتي الورقة ديه منين .. بس والله الورقة ديه لقيتها في شنطتي ومعرفش مين حطها حاولت أقراها بغرض  الهزار مش أكتر بس الموضوع مكنش هزار .. الورقة مش كاملة فطلع ............... اوعي تقري الورقة .. احرقيها او ..... " الورقة كانت غرقانة دم ومكنتش عارفة أقرى حرف تاني .. 

-- عرفت أبويا بكل اللي قريته بس مردتش اقوله اني قريت الورقة الصفرا .. في ظل ما احنا بنتكلم باب الأوضة اتفتح لوحده بطريقة هادية جدا .. سمعنا أصوات جايه من بره بتنطق أسامينا .. وصوت تاني كان واضح أوي وبيقول " الدم .. الدم " الأصوات كانت مخيفة وعالية أوي .. خرجنا من الأوضة واحنا خايفين الباب يقفل تاني وجرينا على باب الشقة بس لقيناه بيفتح بمنتهي السهولة .. خرجنا من الشقة وجرينا ع السلم عشان نخرج من العمارة .. انا متأكده اننا ساكنين في الدور التاني بس احنا نزلنا أكتر من 10 أدوار وكل دور ننزله نلاقي باب شقتنا مفتوح ونكون في نفس الدور مفيش جيران بتلحقنا ولا أي حد سامعنا حتى  .. 

- أبويا نبره صوته كلها قلق وخوف " لازم ندخل الشقة تاني مفيش فايدة .. " دخلنا الشقة واحنا متأكدين ان فيه حاجة هتحصل .. اول مدخلنا من باب الشقة الباب اترزع جامد ولقينا مريم قدامنا ورقبتها مفيهاش أي حاجة وماسكه سكين .. احنا عارفين ان ديه مش مريم 

..يتبع

مع طلاسم قاتلة - قصة رعب  الجزء الثالث

ويمكنك قراءة 

مع طلاسم قاتلة - قصة رعب  الجزء الأول